The next20 張敬軒演唱會，昨晚與觀眾一同歡渡新年，除夕大倒數，軒仔請來MC $oHo & KidNey , Kayan9896及七師傅任嘉賓，笑聲叫聲核爆整個紅館，軒仔安歌兩次，觀眾仍不願離場，最後第三度安哥，軒仔再上台多一首歌，觀眾才依依不捨離去。 昨晚來到嘉賓環節，軒仔同觀眾講，「2021來到最後一日，無論今年發生所有唔好o既，唔順利o既o野，我決定用呢首歌送走佢 ！」音樂響起，大家已經知道係《係咁先啦》，MC $oHo & KidNey , Kayan9896升上來，全館觀眾企曬起身，用歡呼聲一齊大合唱，歡送2021年！MC $oHo & KidNey , Kayan9896接著又為觀眾唱了《Black Mirror》。接下來進入倒數時間，蘇致豪及許賢、Kayan再台上與軒仔一同與觀眾倒數，全場大合唱《倒轉地球》，氣氛hit 爆。 倒數過後，軒仔再請另一位嘉賓七師傅出場，紅館馬上嫌如十級半地震，核爆式歡呼叫聲嘈到軒仔講o野都聽唔到，要叫大家靜一靜，軒仔笑住話:「大家見到我未婚妻咁開心...」七師傅即刻回話，「下，我地乜都未做過喎，咪好唔抵....囉。」笑到全場肚痛，軒仔: 「你又講得o 岩，但係我好保守，有D o野，我要結o左婚先做....你今日綵排叫我咩話？你記唔記得？」七師傅答 : 「老公....唔係....軒公」又引來觀眾狂叫狂笑，軒仔都笑到灣曬身，「我今日聽到呢個字，個心離一離，新年流流...」此時七師傅拖住軒仔手問: 「你隻手咁凍，你係咪嚇親？做足18場，日日咁唱真係好辛苦...」軒仔就好識做話: 「你帶溫暖比我咪得囉。你有咩祕方教我補下身？」七師傅竟然回答，「下一世唔好做歌星啦，太辛苦啦！做國皇算啦你。」觀眾狂笑之餘，軒仔都笑到向前仆，反問: 「o下？國皇後宮佳麗三千，我個腎點搞？」七師傅繼續面不改容，淡定回答，「你剩係獨愛一個人咪得囉。」笑到大家標眼淚。 一場來到，七師傅當然要唱歌，為了表達對軒公的愛，七師傅選了「月亮代表我的心」與軒仔合唱，唱畢，觀眾大叫軒仔「嘴佢！」軒仔最初聽不清反問觀眾，「咩話？娶佢？哦...嘴佢....」此時七師傅搶答，「我ok o架！」又再核爆紅館，大家笑到個台都差不多 塌下來一樣，軒仔更是笑到說不出話來，冷靜下來他用疫情來推卻，料不到七師傅話，「但係你聽下佢地D聲！」全場觀眾即刻拆台一樣大叫揼地，軒仔盛情難卻，師傅再來多句: 「你錫邊度都得！」即引來十級半地震，軒仔唯有嘴o左師傅塊面一啖，師傅隨即問: 「駛唔駛回禮o架？」軒仔此刻已是肉隨砧板上，企定定任嘴。親熱過後，師傅搞笑辯護，「柴J粉絲唔好嬲我，佢係屬於大家o架。我都係搞下氣氛o者。」觀眾即歡呼聲又四起。 最後軒仔揚言今年得到七師傅嘴唇加持，一定好運過人，不如請師傅再加指點咩方位適合他，七師傅回答: 「我計過你條命啦，西面最適合你，你一路同西啦！成個紅館都係西面，我比個錦囊你，你帶睡袋行李搬來紅館住啦。」師傅又突然叫人拿出一個垃圾膠袋，話要送禮物比軒仔，「我本來想送層樓比你，但係我又驚爆緋聞，d 人話我包養你，所以我用好長時間，自己親手做份禮物比你，個垃圾袋係因為出來太趕o者」接著由垃圾袋中拿出一個能量塔，「可以帶比柴J，柴西你，日日咁開心！」此外，昨晚楊受成先生夫人、游學修等一班試當真成員，Locker ，袁灃林及林婷等均有到來捧場。楊生更於後台大讚軒仔演出成功，互相擁抱祝賀新年。