古巨基昨晚於會展舉行演唱會《I REALLY LOVE TO SING｜AROUND THE WORLD LIVE 2023》，相隔4年再開騷，他為了籌劃兩年的「I Really Love To Sing」音樂企劃，這次請來樂壇不少新晉歌手當嘉賓，包括 MC張天賦、Tyson Yoshi、Delta T、力臻、Dark、細貓、吳保錡、張蔓莎、女團Lolly Talk、洪助昇、黎展峯、張進翹、顧定軒、女團STRAYZ、何佩、劉君冬、黃劍文、張天穎、谷旻、黎展峰、陳天翺、Michael C、Lowa、Triple G及RUMBU等等。 Opening基仔以一襲白色長西裝造型升上來，唱出《我生》、《初初》、《任天堂流淚》、《眼睛不能沒眼淚》及《漂流教室》。其後基仔換上藍白色造型，並邀請到Delta T及力臻上台分別合唱《有少少愛》及《Can we try》。接著Tyson Yoshi穿上貼身白色恤衫驚喜現身，與古Sir合唱《第二最愛》，令全場歡呼尖叫。MC出場張天賦合唱《自我安慰》更立即掀起高潮，合唱過後MC留在台上獻唱《記憶棉》，令現場歌迷立即瘋狂尖叫。而到《星戰》一曲，16個單位，19人一起同台演出，陣容非常壯觀。台上基仔分享今次是做了爸爸後首個演唱會，兒子Kuson首次欣賞自己的演唱會，所以特別有意義，「話說我已經好幾年冇開騷，對我嚟講，做爸爸後第一個演唱會。呢個都係我個仔第一次睇我演唱會，我唔知佢坐邊度，佢昨日有睇綵排，仲要上舞台，後來比佢上來跳咗兩首歌，帶返佢落去後，佢竟然話『 I'm sad，點解帶我走』 不如大家俾佢感受下咩係演唱會聲？一齊幫我嗌下佢個名「Kuson」！」現場近萬人一齊大叫Kuson，並且拍手歡呼，基仔謂，「多謝大家，我估老婆有拍低，Kuson睇番一定覺得好得意。」此外談到今次與樂壇新一代的合作企劃，基仔謂今晚請來好多新歌手，可能大家未必了解他們的名字和音樂，當中有一些自資出唱片，網上自己發表歌曲的歌手，沒太多資源支持，我好希望大家多多留意他們的音樂，「多謝所有今晚來參予演出的每一位歌手，最近流行AI，我都有嘗試探討AI係咪真係可以代替音樂圈，我嘗試叫AI寫歌，問AI可唔可以寫隻歌比太太同個仔，結果就出咗兩段野…」現場看到營幕上打出的兩段老土文字，即刻爆笑，基仔就話，「所以目前階段，我肯定AI係寫唔到歌！佢地嘗試學人類感情，學唔學到呢個係問號，但係現階段係一定做唔到。AI係冇可能做到人類音樂同歌聲，好似今晚係台上的新一代歌手，佢哋付出好多努力，高低起跌，咬住麵包都要做音樂，把經歷寫出來，全部都有血有肉，AI係唔可以做到。希望大家比多些支持香港每一位努力做音樂的歌手。」獲得全場掌聲。此外Encore部分，古Sir特別唱出《必殺技》、《重複犯錯》，令歌迷都唔捨得走，安歌過後不停再叫安歌，但礙於時間及場地限制關係，歌迷最終只得依依不捨離開。完騷後基仔接受訪問時，他坦言沒想到下台後，仔仔並沒有回家，忍著眼瞓都要喺台口等著迎接他，還嚷著要上台，觀眾希望他安歌再安歌時，他曾經想過係咪帶仔仔再出場，可是由於現場已經開始有觀眾離開，人流太多他再升台可能又引起混亂，只得把帶仔仔上台見大家及感受一下觀眾的歡呼威力這個機會，留待下次演唱會。基仔坦言仔仔日後有能力可以表演的話都不會阻止，更大讚仔仔跳舞比自己叻。而他亦一直構思中，希望用仔仔由細到大的聲音集合mix成一首歌作為紀念。談到今次跟很多樂壇新一輩歌手合作，基仔直言合作時才知道有很多新人都咬著牙關去做音樂，他們當中有很多人都是獨立歌手，又或者是剛剛簽了細公司而需要更多資源幫助，所以已提議一班歌手開了一個群組互相認識，而自己亦會盡力去協助他們。明年是他入行30週年，「其實係33，我做咗3年主持及訪問之後先唱歌，所以明年睇下公司安排，可能會再搞演唱會啦。另外，我又想再搞個企劃係同新一代作曲填詞的音樂人合作，未來都會開始忙碌番。」