日前Hi-Fi靚聲女歌手艾妮（Elly）現身「香港高級視聽展2023」，為早前推出的全新Hi-Fi大碟《TOKYO BLOOM》宣傳。現場不少歌迷買碟支持，Elly除了於專輯及海報上簽名，又與歌迷合照，氣氛熱鬧。大碟《TOKYO BLOOM》全碟於日本錄音，收錄於碟內其中三首歌曲《報復式浪漫》、《記憶棉》及《想見你想見你想見你》MV亦於日本拍攝，《報復式浪漫》MV早前已推出，《記憶棉》MV今日（17日）亦已上架。Elly表示這次是最難忘的一次MV拍攝，「嚟到日本，我以為係春天嘅時間，所以我係着咗短袖衫嚟，我係絕對唔夠衫！每一次拍攝係好凍！同埋我拍攝嘅衫全部都好薄，基本上係完全保唔到暖，所以我覺得今次嚴冬嘅拍攝對於我嚟講係非常之難忘。」這次日本之旅由於要錄音及拍MV，Elly需於當地逗留超過兩個星期，出發前，她亦預備了不少美容用品帶到日本，不過最後無用武之地，「因為我唔係一啲好容易瞓到覺嘅人，我又好驚唔可以喺一個好好嘅狀態下拍攝，所以我就準備咗一啲發熱嘅眼mask，諗住可以好瞓啲，但我發覺原來每一日拍攝嘅行程實在太過多啦！返到酒店係即刻瞓着咗！所以呢啲其實係唔駛用，哈哈！」除之之外，Elly又自爆帶備充足銀彈準備掃貨，但「下場」跟她的eye mask一樣，「今次嚟到日本我係帶咗好多錢！但係冇時間用，完全係有錢冇掟使！」她又預告《想見你想見你想見你》MV會於日內推出，提到這首歌的MV，Elly又有趣事分享，「我哋每次去到唔同嘅場景，都好希望capture到好多好靚嘅畫面，所以我哋通常都over run半個鐘至一個鐘。但嗰日因為係租cassette舖嘅場地，負責人最尾嗰一分鐘就趕晒我哋出舖，唔俾我哋繼續拍攝，但好好彩我哋最終都完成到。喺呢件事上面，我發覺日本人同香港人嘅守時觀念真係差好遠！哈哈。」