TWINS SPIRIT演唱會眨眼完成第三場，今日阿SA(蔡卓妍)阿嬌(鍾潼)終於可以休息一天，25號才再展開接下來的11場演出。昨日天氣雖然凍到得幾度，但無減觀眾熱情， 一開騷觀眾就幾乎企晒起身又唱又跳，TWINS台上也答謝大家: 「你哋的熱情係咁凍天氣下，俾到我哋全晚力量！好勁呀！」昨晚TWINS不單搞「笑」觀眾，亦同時搞「喊」大家，係唱《相愛22年》前，互訴心聲時，阿SA同阿嬌講:「親愛嘅鍾欣潼女士，哈哈.....多謝你22年來成為我拍檔！我人生最大成就，就係同你成為組合！呢個江山係我哋打番嚟！而無論開心或低潮你都對我不離不棄，陪住我，出面好多人覺得我好醒，其實唔係㗎，我內裡唔係一個非常自信嘅人，好多時你同我一齊，我多左好多力量，多謝你呀鍾欣嬌。」而阿嬌則回話，「認識你22年，我真係冇諗過我地可以走咁遠，開始個陣，出面好多質疑嘅聲音，話我哋好快就冇㗎啦咁，但係我哋係逆景更齊心，更同心對抗出面，多謝你冇放棄我，我亦冇放棄自己。」現場歌迷即時感動，大叫: 「你哋要加油！」而阿SA亦被感動回話，「你係我認識人裡面，個樣最柔弱，內心最堅強嘅人，好多謝你冇放棄自己。」繼而兩人相擁抱。不少歌迷聽完他們對話，都眼濕濕被感動淚下。而係其他環節，TWINS兩個都為現場帶來不少歡樂笑料，阿SA提醒大家，入場記得悉心打扮，扮番TWINS以前的造形，最佳造形每晚她們也會在台上送上演唱會限量簽名版Sweatshirt比大家，昨晚他們就選了一個四歲小朋友贏得獎品。 握手環節阿SA兩晚也太慢，握到第三首歌完了都未握完四面觀眾，要阿嬌企係到等，又經常搞笑大叫: 「哎也，幣啦，我未握晒呀，我好慢呀。」安歌時唱《丟架》時，SA突然大叫停，正當大家不知發生什麼事時，原來是她一開口唱就咬到自己條脷，要重新唱過，搞到阿嬌狂笑問她「冇嘢嘛？」而SA除了自己狂笑，不停反問:「喂呀，點解次次咁嘢都發生我身上架㗎，冇理由㗎，我食得咁清， 唔會熱氣㗎。我地抹走佢重頭來過！」而阿嬌就笑住話，「係抹唔走㗎，哈哈。」 兩人表現非常搞笑可愛，為全場帶來歡樂無窮。順利完滿成功完成三晚演出，今天TWINS終於可以休息一日，25先再開騷，阿SA昨晚台上就已經叫觀眾大家注意保暖，「今日好凍呀，你哋著夠衫？我今朝好似細個返學個陣咁，凍到唔想起身，但係返到紅館，一開場感受你哋嘅熱情，真係即刻充滿能量呀。」觀眾即報以超熱烈歡呼聲。完場後TWINS兩人異口同聲說，「YEAH！終於三場完成，可以放假。好想食宵夜，好餓，可能係今晚觀眾太熱情，全部都唔鐘意坐低㗎，成晚都企晒起身跳舞，我哋都用多左好多能量呀。」休息日會做咩？兩個都話，「跳足三晚，按摩，要按摩呀，哈哈。」