英皇唱作雙子祝捷會

英皇娛樂兩大唱作「新人王」羅力威(Adason)同阿Jay馮允謙,2012年於樂壇各大頒獎禮,合共「掃走」二、三十個各類獎項,成績驕人屬各大唱片公司旗下新人之冠,無負「新人王」之名!昨日英皇娛樂就特地為兩人舉辦「祝捷會」,除得到「大哥」吳雨及霍汶浠兩位英皇高層到場祝賀外,還邀請各大電台的「話事人」如新城電台台長朱明銳(銳哥)、商台甘菁菁及唱片監製舒文、恭碩良等音樂人齊齊見證兩人的優異成績。兩大「新人王」更即場Jam歌各自演奏,互唱對方的成名作,盡顯「唱作」功架。 台上吳雨大哥更「妙語連珠」引得全場發笑,「我地英皇娛樂搵人返嚟真係好多野都要「夾過」㗎,好似你兩個個名咁,一個就叫阿威,咁威得耐就會「囂」!所以呢,呢個時候就要「謙」了,知道無?」搞到阿Jay同威仔都忍唔住係咁笑!輪到Mani上台向Adason頒發「成績表」嘉許其獲獎良多時,Mani即開玩笑指住「成績單」上大哥的簽名,「見唔見到呢個「吳西」呀?你地加埋咪即係「吳威」同「吳謙」囉!」聽到Mani咁話自己,大哥喺台下都笑住話Mani「搞搞震」。 提到兩人為公司爭得多個獎項,阿威則笑言多謝公司,「唔止係我嘅,阿Jay都好好成績,(你威啲啦)唔會啦,跟住大哥就威!」講到身為「巨星」幫出身的新人,不少如胡鴻均、許廷鏗都傳出「斷背」傳聞,阿Jay一聽即馬上「澄清」,「我鍾意女仔㗎!我地平時都有一個「Group」,成日約埋去做運動。(做咩運動先?)阿威即表示,「做男性運動,打籃球囉。」 問到羅力威橫掃多個頒獎禮,對於U老闆簫定一曾發表的「二打六」之說,是否有吐氣揚眉的感覺?他即表示沒有放在心上,「都咁耐啦件事,自己有咁嘅成績係應該要嘅,希望將啲獎當係份禮物送俾老闆」。問到兩人奪獎眾多會否獎勵自己?阿Jay即表示已經花費5000蚊買咗個電子琴俾自己,而阿威則反而沒有什麼想買,「早幾日因為去南寧工作所以錯過咗媽咪嘅生日,所以今次會同佢補祝生日,仲會俾封5位數嘅利是佢,等佢過年」。