古巨基美國演唱會唱到凌晨四點 俾歌迷扯到成個坐低

今個聖誕節古巨基去了美國舉行「古巨基我們世界巡迴演唱會」,今次演唱會在之前一開賣就極速售罄,絕對是一票難求。為了迎接聖誕,所以演唱會在當地25號凌晨一點先開騷,一開場基仔就以快歌「爆了」辣㷫全場,跟住更唱了多首經典金曲,觀眾high足全場。期間基仔在演唱會上大爆自己同古太的情史,更捉了三對情侶上台,對他們進行大逼供,要他們自爆情史,其中一個男觀眾仲唔覺意,爆響口話自己結婚前試過好多女仔,嚇到基仔要連忙幫佢補鑊,幫口同佢老婆講:「係試過同幾個女仔拍拖~先至最終遇上最好嘅妳!」去到encore環節,基仔突然從觀眾席出現,現場的歌迷瘋狂湧向基仔,握手之餘仲摸面同摸身,逼到基仔完全行唔到,要提早返上台,而觀眾亦唔肯返埋位,企喺台前唔肯走,更有觀眾太熱情在握手時想扯基仔落台,搞到基仔成個人失平衡坐低喺台上,之後基仔又同全場觀眾進行facebook直播,大唱聖誕歌普天同慶。基仔表示在大時大節開騷同大班人一齊過氣氛特別正,不過由於要在凌晨一點開騷,加上美國嘅時差,都拍捱唔住眼瞓,開騷前特別飲了幾樽能量飲品打底,點知見到啲觀眾咁high,唱到唔識攰,結果唱到凌晨四點先肯完騷。