Twins《LOL世界巡迴演唱會》再次返回廣州 慶祝成軍十六年

巡到第十五場,再一次返回廣州開騷,慶祝成軍十六年,從來沒有預計過演唱會會這樣成功大賣,一直長唱長有,Twins 二人又開心又感動,台上再唱「相愛六年」眼淚不止,並再一次公開嘴嘴宣告希望日後還可以有無數的十六年。去年5月21日廣州開騷的Twins, 今年 520 又再次返回廣州再開《LOL世界巡迴演唱會》,同樣一開便爆,一票難求。今年更把香港的四面台完整搬上廣州多演一次,孖女多次被萬人大合唱感動,阿Sa於台上說,「阿嬌,我識咗你17年啦!大家一齊工作就16,多謝你一路以來陪伴住我,我愛你。」阿嬌就忍著淚光對Sa說,「你改變咗我好多,由我唔鐘意彩色,由鐘意黑白變到個人生愈來愈彩色,愈來愈開心,由唔鐘意講野,變到講多咗好多野,愈來愈笑多咗,講真架,我真係好愛你,好愛。」阿Sa: 「好啦咁,希望我地大家繼續有無數咁多個十六年啦,二十六年,三十六年..... 」,然後兩人笑言,「十六年我地唔做番d野,相信你地都唔肯俾我地走.....」接著便於歌迷大叫嘴嘴之下,兩人台上再次嘴對嘴親吻,令全場歌迷瘋狂興奮大叫。演唱會後,Twins二人異口同聲表示從來沒想到這麼快一年後又到廣州再開,真的十分開心,今年更是踏入第十六年合作,阿嬌坦言十六年這個數字好感動之外,其實都好得人驚,有點無奈時間過得飛快,咁就十六年。阿Sa就話其實好多野好似昨日才發生,點知已經十六年真係非常不可思議。由於香港很多歌迷都叫他們巡迴之後再次返香港開騷,所以他們正嘗試入紙紅館,看看2018年五月是否可以再返紅館開騷。