鍾舒漫與大學生jam舞 為新歌《小碎步》打造新舞蹈

歌手鍾舒漫 (Sherman) 近日推出新歌《小碎步》,節奏感強的曲風,加上MV中不少高難度的舞蹈大騷「舞功」,結果大獲好評。而勤力的Sherman自然不敢怠慢,除了不時在網上平台分享跳舞片段,之前又跳入蘭桂坊與50人挑戰跳舞busking;日前,Sherman聯同一班大學生jam舞,為小碎步打造另一種全新格調的舞蹈。Sherman分享到:「今次同我合作嘅學生來自大學的舞團,叫JBS Champion Team 2017。唔好以為學生的水平好參差,其實佢地係舞蹈比賽冠軍,而且個個都係我「老師」。因為今次由編舞,服裝全部由學生指揮,我只要配合就得。」Sherman表示有此安排,主要想趁機感受年青人的創意同諗法,結果帶來意想不到的收穫。「因為我冇跳過 popping 同 locking兩種舞蹈,估唔到今次終於有機會學。為咗可以同佢地一齊完成新版本,我好俾心機上左速成班,盡晒力嘗試短時間內跳到似模似樣,希望大家鍾意啦!」Sherman興奮地說。而要數當中印象最深刻的,Sherman坦言好欣賞這班年輕人夠膽識同熱血,回憶當年讀書時自己都有跳舞,但卻欠缺勇氣去成立自己的舞團,眼下見到這班年輕人目標清晰,心裏面既羨慕又佩服。問到同年輕人相處有無難度,Sherman笑謂:「跳舞的時候大家都全程投入,而且今次我要向佢地取經,話題反而多到不得了呢!」