吳浩康年尾開騷瞓唔着 一個鐘內秒殺所有飛

最近於自己社交平台密密開live唱歌、又周圍去busking的吳浩康(Deep),早前宣佈十二月於九展開騷。今朝九點就喺網上優先訂票,唔知係咪「集體回憶」番晒嚟,開賣一個鐘內,門票已經秒速售罄,咁好反應,連阿Deep自己都估唔到,佢話:「冇諗過係咪真(一個鐘內賣晒),因為同我講嗰個同事我比較信任佢,所以佢一同我講,我真係好開心、好激動,好多謝身邊同事、朋友、家人嘅support。」佢仲話緊張到瞓唔着,「其實一路都好緊張個狀況,擒晚一路都瞓唔着,到半夜四點我都未瞓得着。今朝一起身都留意住個狀況,見到咁多人支持自己,更加要做好啲,唔好令大家失望。」咁會唔會加場先?「加場我梗係想啦!我自己都好想唱!但係都要交俾公司同大會研究吓再去決定,好希望可以加到場。」新歌《較早前錄影》MV亦都於今日首播,八年冇出歌,Deep話感覺好ok,新歌搵嚟黃偉文(Wyman)填詞,原來Deep好多經典歌都出自Wyman手筆,「我第一首派台歌《先入為主》,之後《洗剪吹》、《擇日失戀》都係Wyman填詞。」對於新歌歌詞,Deep話要特別感謝Wyman寫嘅一句「從自棄到自重」,再一次寫出佢心聲,「其實面對被標籤嘅狀況都冇得理太多,索性做好自己先,專注去實踐自己嘅目標。」咁佢嘅目標又係乜?「不到紅館心不死,開騷係我好想做嘅一件事!」嗱,優先訂購就爆滿,幾時公開發售就要留意啦!MV 故事簡介:今次Deep的MV起用新人Angus,夥拍網絡紅人曾樂彤做對手戲。故事中,男主角(Angus飾)起初是名古惑仔,拳頭交是家常便飯。奈何女主角(曾樂彤飾)為了心愛的人,寧願一同活於飄泊生活中。直至一日,男主角覺得辜負女方一片苦心,於是的起心肝重生做人,甘願由低做起,裝修、送外賣等工作都在所不辭。縱男主角肯為女方改過,但視野擴闊了的女主角卻不再依戀這份幻得幻失的感情,最後灑脫離開。