李克勤新歌《龍鬚糖》 溫馨畫面築起珍惜眼前

李克勤新歌《龍鬚糖》,由馮翰銘監製、周國賢作曲,林若寧填詞,借眼前的種種舊物,慨嘆大家總在快要失去時先懂得珍惜。問到克勤點解用龍鬚糖做歌名,佢話:「其實我同馮翰銘好耐之前就傾過,一直想用香港地道情懷做主題作首歌,而「龍鬚糖」正好有呢種古老風味嘅味道。今次最早有定案嘅反而係歌名,就住龍鬚糖呢三個字,再延伸落去創作其他部分。」歌曲的創作概念亦延續到MV拍攝,以故事形式記錄,話說男主角於街上見到有位老伯賣龍鬚糖,突然一位可愛小朋友迎面而來,原來係龍鬚糖伯伯嘅孫女,同爸爸媽媽一齊嚟接放工,咁溫馨嘅場面令男主角一時感觸,當佢食一口甜絲絲嘅龍鬚糖後,就諗起段段往事。克勤補充到:「呢首歌都唔係一味叫人懷念,反而想講好多人、事、物一直都存在,只係大家習慣地忽略,與其要到失去先驚覺要珍惜,倒不如活在當下。」雖然新歌主題以情懷出發,但克勤今次都有新嘗試,佢特別提到同作曲嘅周國賢係第一次合作,克勤話:「我一直都好欣賞周國賢,想同佢合作好耐,因為同不同嘅作曲人交流,會帶出唔同火花。」大家聽歌時要留意啦!