籌備咗成年，張敬軒有份投資嘅「仙后餐廳」噚晚（17/1）終於正式開張！咁高興嘅事，唱片公司都吹晒雞齊齊撐場，除咗霍汶希、惠英紅、任達華、泳兒、吳浩康、洪卓立、湯怡、許靖韻同曾樂彤，就連老闆楊受成同太太陸小曼、楊政龍都到場支持。餐廳裝修風格大玩六十年代風，為咗配合餐廳主題，各賓客都以vintage、classy為dress code，當中最配合主題就係泳兒，就連軒仔都話：「Vincy係全場嘅best dresser！」餐廳大至整體裝修、小至卡座布簾，都由軒仔策劃主理。另外，餐廳同時係live house，駐場歌手會獻唱多首香港時代曲，為咗能夠搵出一把最靚嘅聲唱出朕「香港味」，駐場歌手都係由軒仔親自挑選。除此之外，總廚亦係專程由法國請嚟，而且佢仲舉家搬嚟香港定居，認真巴閉。將音樂、藝術、食物融為一體，軒仔今次真係嘔心瀝血。飲飽食醉後，蛋糕突然「出場」，原來係一班藝人歌手提早為2月1日生日的軒仔慶祝生日，餐廳開張加surprise birthday party，恭喜晒呀張老闆！