吳浩康‌（Deep）今日推出新歌《愛沒懷疑》。《愛沒懷疑》由Deep操刀作曲，陳耀森填詞。一直以來，Deep唱過不少經典苦情歌，卻鮮有甜蜜故事放於他的歌曲內，這次他親自作曲，演繹了一首幸福滿瀉的冧爆情歌。創作歌曲時，Deep回顧自己以往的作品，得出一個字：「慘」！他說：「我嘅歌除咗慘，就係好慘，一係就冇咁慘，一係就慘到唔知點講，點解會做啲慘嘅歌？其實係因為比較手到拿來嘅一個曲式。所以覺得song list裏面係時候要挑戰一隻冧嘅情歌。」他說自己作曲自己唱，或多或少會把自己的生活感受、情懷放進歌曲內，「我覺得一個歌手，或者一個人都唔會淨係得唔開心、或者開心、或者興奮嘅moment，會有好多唔同嘅階段，我覺得呢隻歌係完整番我嘅song list。」問到他在情路上甜酸苦辣哪一樣比較多？他坦言各樣都有，「好難去統計，但我好感恩每一個經歷，因為每經歷一件事或者每一段關係，都會令我成長好多，我會覺得呢啲係成長裏面嘅印記、遇過嘅一啲好人好事。」他笑說想對自己好一點，所以酸、苦盡量不記，「但甜嘅係有好多。」他更透露現階段的「味道」，「我而家都甜。」MV以「失憶」為拍攝概念，Deep表示：「如果俾我選擇唔記得一樣嘢，到暫時為止，我人生嘅價值觀都係我無悔經歷過任何嘅開心同唔開心，而我經歷過嘅事，我都已經擁有咗，所以我唔會選擇忘記我人生中每一個時刻。」另外，Deep將於十二月三十日於旺角麥花臣球場舉行「DEEP 2019+1演唱會」，門票今日於KKTIX公開發售。事隔兩年再開騷，Deep表示可以藉着演唱會答謝一眾這一年來並肩作戰的隊友，「而家密鑼緊鼓咁練氣、練歌。歌單方面，都會喺網上收集歌迷嘅意見，盡量唱一啲佢哋想聽嘅歌，可能未必係一啲大家耳熟能詳嘅歌，希望可以滿足到佢哋。」