容祖兒Pretty Crazy Love in Europe巡迴演唱會前晚在荷蘭海牙AFAS Circus Theatre舉行， 據知開賣門票已經早被秒殺，坐無虛席之下，場外更有歌迷守候希望買到炒賣的門票進場。第一次到荷蘭演出，祖兒謂心情是相當興奮，台上她跟觀眾表示，「人生一直有一個願望可以來荷蘭開演唱會，因為荷蘭係一個我好喜歡地方，咁今日在座咁多位一齊來見証我願望成真一刻，我真係好開心，好難形容自己心情，夢境成真之下，眼淚湧湧下又要故作堅強嘅感受，我只可以用百感交集來形容。」台下祖兒歌迷來自五湖四海，不單止有荷蘭人，更有一些歌迷是從香港、新加坡，馬來西亞，巴黎甚至南美巴西飛來捧場，祖兒一一多謝大家，「冇諗過世界上咁遠有咁多鍾意我的人，希望大家今晚睇得開心，放心。」唱唱下，祖兒又在觀眾群中發現有位荷蘭男歌迷，竟然識唱她的歌，「嗰位外籍男歌迷，佢懂得唱完我整首歌，佢唱個陣我好像在玩猜歌遊戲一樣，又開心又好笑又感動， 真係冇諗過佢地咁有心，學唱曬我d 歌來捧場。後來佢入來後台影相，佢話第一首識得我嘅歌係《爭氣》，仲真係唱多次俾我聽㖭，佢重話上載過一條片到網上，佢自彈自唱《習慣失戀》！ 真係好厲害！ 」十年前祖兒已經同Miffy 合作過一齊crossover出演唱會T-shirt，今次祖兒入行20週年，親臨荷蘭開演唱會，適逢Miffy又是65週年紀念，Miffy二話不說便出現成為容祖兒演唱會中的特別嘉賓，出場陪祖兒一起唱歌，令觀眾欣喜若狂，此外Miffy又再次與祖兒合作，為荷蘭站打造了限量的演唱會紀念品，開場前全部被歌迷秒殺掃空。祖兒台上與巨形Miffy又攬又抱，「一見Miffy出來，我即刻開心到變番七歲，今次都係得到Miffy保祐，我地荷蘭演唱會先咁成功，賣到爆曬，哈哈。」最近新冠病毒在歐洲感染數字愈來愈多，所以祖兒坦言出發之前都開了無盡咁多次會議，商議究竟是否可以安全成行。 決定成行之後，祖兒話都有小心保護自己，為了有健康體魄，每日也狂食維他命C，幾乎是任何有維他命C的飲品食品也不放過，每到之處都包到自己像一隻糉一樣，避免冷親，務求以最佳狀態演出。祖兒話，「千萬唔可以冷親，所以都迫自己早啲瞓，好彩荷蘭同香港相差七個鐘，我平日上床瞓時間，正好係荷蘭晚上11點，對我來講一啲時差都冇，到步之後每晚都休息得好好，瞓得好先唔會容易病。 同觀眾大家都為免太近距離互相接觸，所以冇握手，冇抱抱，只是隔空飛吻囉。」荷蘭演唱會完滿成功， 祖兒之後會飛到倫敦準備3月9日在The London Palladium 的Pretty Crazy Love in London巡迴演唱會。